Atrus documentus :: Acabada

Acabada

Gràtzias a is bintiduus interbistas chi eis lìgiu eus pòtziu fai connosci una di’ de traballu de is minadoris, de obrescidroxu a scurigadroxu. Is traballadoris, in prus de su chi ant bìviu issus, ant arrego(r)dau contus de atra genti puru.

Unu sistema nou po promovi e donai balori a su logu, fendideddu cresci in s’economia puru, est a ponni imparis su logu, sa stòria e sa genti chi nci bivit.

Su turismu in su Gerrei depit tenni contu de is fatus de s’economia e de sa vida, aici sa curtura de sa mina podit essi una sperièntzia po connosci e po cumprendi su logu e is cambiamentus. Est un’arrespusta a is problemas de s’arti, de su crescimentu e de s’arrichesa de su traballu in su logu.

Su turismu in Sardìnnia est giai totu po mari, pagu o po nudda arrelatau cun su logu, ma po amellorai s’oferta de turismu tocat a pensai a fainas noas. De custas, est arrennescendi meda, de diora, su turismu in sa naturalesa, chi custa calidadi de turista est atentu e disigiosu de connosci.

Sa Sardìnnia andat beni po custa caliadidi de turismu e su Gerrei depit ‘essiri unu logu connotu, chi no fait a ndi fai de mancu, in custus programas. S’oferta depit tenni medas possibilidadis, de sportu, de curtura, de spetàculus de connotu e de museus, chena chi su turista ddas depat ci(r)cai a pedra furriada.

Is fainas depint essi a marolla po torrai bellu su logu, fora de fai dannu a sa naturalesa e sa mirada. Su Gerrei tenit pagu struturas po benni sa genti e custu fatu fait isulamentu e dannu a s’economia. Su sistema chi arresu(r)tat bincidori est a fai pigai pa(r)ti a sa genti, po fai imparis custu caminu de crescimentu.

Un’atru fatu de importu mannu est a fai unu sistema de informu tennològicu e chi is turistas potzant pigai pa(r)ti po gosai su prus chi fait de totu su chi teneus. Totu custus traballus, tocat chi a ddus fai siat genti chi tengat cust’arti e cun totu is ainas chi fait a imperai e at a tocai a imparai atra genti puru a posta.



Sa mina de Su Suèrgiu in Biddesatu
Progetu "Sa mina de Su Suèrgiu in Biddesatu". Comunu de Biddesatu e Provìncia de Casteddu. Lei arregionali 26/97 - art. 13.